नेकपा एमालेले आगामी मंसिरमा बुटवलमा गर्ने तय भएको दसौँ राष्ट्रिय महाधिवेशनको स्थान परिवर्तन भएको छ । महाधिवेशन बुटवलको साटो चितवनमा हुने भएको
छ । विहीबार बसेको स्थायी कमिटीको बैठकले दसौँ महाधिवेशन बुटवलबाट चितवन सार्ने निर्णय गरेको हो ।बिहीबारको स्थायी कमिटी बैठकले असोज १५–१७ गते गोदावरीमा सम्पन्न
विधान महाधिवेशनको समीक्षा गरेको बैठक पछि एक नेताले रातोपाटीलाई जानकारी दिए । साथै, १० बुँदे सहमतिका विषयमा विहिबारको बैठकमा छलफल हुने एक स्थायी कमिटी सदस्यले बताए । बुधबार एक कार्यक्रममा अध्यक्ष केपी शर्मा ओलीले १० बुँदको औचित्य सकिएको बताएपछि तेस्रो धारका नेताहरु असन्तुष्ट देखिएका छन् ।यसैबीच दसौँ महाधिवेशन सफल पार्नका लागि रामबहादुर थापा बादलको संयोजकत्वमा २१ सदस्यीय मूल व्यवस्थापन कमिटी पनि गठन गरिएको बैठकपछि पार्टीका प्रवक्ता प्रदीप ज्ञवालीले पत्रकारहरुलाई जानकारी दिए ।
थप समाचार
ओलीको बोलीले एमालेमा तरंग, आजको बैठकमा तेस्रो धारले आपत्ति जनाउने
नेकपा (एमाले)का अध्यक्ष केपी शर्मा ओलीले पार्टी एकताका लागि असार २७ गते गरिएको १० बुँदे सहमति अर्थहीन भएको टिप्पणी गरेपछि एमालेका तेस्रो धारका नेताहरु आक्रोशित बनेका छन् । यो विषयमा विहीबार (आज) बस्ने स्थायी कमिटी बैठकमा कुरा उठ्ने भएको छ ।एमाले अध्यक्ष ओलीले बुधबार वागमती प्रदेश अधिवेशन आयोजक कमिटीको बैठकमा पार्टीका कतिपय नेताहरुलाई ‘१० बुँदे, १० बुँदे भनेर ट्याङ ट्याङ् नगर्न’ चेतावनी दिएका थिए । अध्यक्ष ओलीको यस्तो अभिव्यक्तिपछि १० बुँदे तयार गर्ने नेताहरु आक्रोशित बनेका छन् ।
एमाले उपाध्यक्ष भीम रावलले ओलीको उक्त टिप्पणीप्रति सार्वजनिक रुपमै असन्तुष्टि जनाउँदै पार्टीलाई एकताबद्ध बनाएर लैजाने हो भने सहमति कार्यान्वयनको विकल्प नभएको चेतावनी दिइसकेका छन् ।अध्यक्ष ओलीले बुधबारको आफ्नो मन्तव्यमा १० बुँदेको औचित्य सकिएको आशय मात्रै व्यक्त गरेनन् । उनले पार्टीभित्र अझै ‘माधव प्रवृत्ति’ कायमै रहेको भन्दै तेस्रो धारका नेताहरुलाई माधव प्रवृत्ति त्याग्न चेतावनीसमेत दिए ।
बुधबार के भनेका थिए ओलीले ?
हामीले आन्तरिक अनेकता होइन एकतामा जोड दिनुपर्छ । हिजो कता के भयो ? यो १० बुँदे । केके जाति एकतारे बजाएर भजमन गोविन्दम् गरिरहन आवश्यक छैन । १० बुँदे १० बुँदे, १० बुँदे, १० बुँदे ….। यो पनि धेरै रेटिरहन आवश्यक छैन । मिलेर, एकताबद्ध भएर अगाडि बढौं न खुरुक्क ! अब कति बजाउने १० बुँदे ट्याङट्याङ …? माधव आउँछन् कि भनेर १० बुँदे गरेको । अब के १० बुँदे, १० बुँदे ? हाम्रो पार्टी, हामीले बनाएको पार्टी अलिअलि साथीहरूले बाटो बिराउनुभएको होला । फर्केर आउने काम गर्ने सिद्धियो त ! हामीले भनेका छौं । माधव नेपालको कुरा बेग्लै हो । माधव नेपालसँग झुक्किएर गएका बाटो बिराएकालाई पनि फर्क भनिरहेका छौं हामी ! कुनै भेदभाव गर्दैनौं, आउ । योग्यताअनुसार कमिटीमा बस्ने, जिम्मेवारी लिने, जहाँ राख्न मिल्छ राख्ने । कुनै आग्रह छैन, तर माधव नेपाललाई नो इन्ट्री !
तेस्रो धारका नेताहरूप्रति ओलीको अर्को टिप्पणी यस्तो थियो–
पार्टीभित्र गलत प्रवृत्तिहरू निकै झाँगिएका छन् । त्यो प्रवृत्तिका विरुद्ध हामीले जुध्नुपर्छ । गलत प्रवृत्तिले जित्नुहुँदैन । त्यसो गर्दा हामी एकजुट हुनुपर्दछ । एक आवाज, एक स्वर हुनुपर्छ । हाम्रा अनेक स्वर हुन थाले भने ?कमिटीमा निर्णय गर्यो बाहिर निस्कियो । आफूलाई कुनै चित्त नपरे पनि त्यो कमिटीले पास गरेपछि कार्यन्वयन गर्नुपर्छ । त्यसको टीकाटिप्पणी –ल कमिटीले त यस्तो निर्णय गर्यो म सहमत छैन । मैले त भन्दिएको छु सहमत छैन भनेर । यस्तो पनि हुन्छ ? त्यो त व्यक्तिवादिता हो ।
यो संस्थावादिता भएन । संस्थागत भएन । संगठनात्मक आचरण भएन त्यो । मेरो त यो हो कुरो, पार्टीको चाहिँ यस्तो हो । कमिटीको निर्णय पास एक स्वरले भन्नुपर्छ हामीले यस्तो निर्णय गरेका छौं, यो सही छ । यो कार्यान्वयन भएर अघि बढ्छ । र, चित्त बुझेको छैन भने कमिटीको बैठकमा यस–यस कारणले गलत भन्ने लाग्छ, यसो गर्नुहुँदैन भन्ने मलाई लाग्छ, असल मनसायका साथ तर्क गर्नुपर्छ । असल नियत, असल तरिकाले ।तर्क गर्दा, छलफल गर्दा असल तरिका हुनुपर्छ । एक अर्कालाई होच्याउने, अपमान गर्ने, टिप्पणी गर्दा मतभेद बढाउने खालका क्रियाकलाप र तौरतरिका हामीले गर्नुहुँदैन । हाम्रा तौरतरिका एकदमै मिलनसार साथीहरूका बीचमा । सत्रुसँग लड्न नसक्ने, आफ्ना विचारमा चाहिँ लडेर बस्ने माधव नेपालको जस्तो ? विरोधीका पाउ मोल्ने, म्याउम्याउ गर्ने, दिनैपिच्छे बूढानीलकण्ठ र केजाति । अहिले त बालुवाटारतिर सर्या छ । म्याउँ म्याउँ गर्न दिनैपिच्छे पुग्ने, निवेदन हाल्न पुग्ने, अनि पार्टीका विरुद्धचाहिँ… । आफ्ना विरुद्ध, साथीहरूका विरुद्ध… ।
अध्यक्ष ओली अगाडि सोही कार्यक्रममा बोल्दै उपाध्यक्षसमेत रहेकी अष्टलक्ष्मी शाक्यले कम्युनिस्टहरूको एकताको प्रसंग निकालेकी थिइन् । साथै उनले कात्तिक ६ गते हुने वडा अधिवेशनबारे पनि असन्तुष्टि जनाएकी थिइन् । उनले हतारमा वडा अधिवेशन गर्न नहुने तर्क गर्दै आफू त्यसको पक्षमा नभएको शाक्यले बताएपछि ओलीले यस्तो टिप्पणी गरेका हुन् ।
ओलीको टिप्पणीमा रावलको प्रतिवाद
१० बुँदे सहमति गर्ने कार्यदलका संयोजकमध्येका उपाध्यक्ष रावलले संस्थागत भइसकेको विषयमा ओलीले विवाद उत्पन्न गर्न खोजेको बताएका छन् । उनले सामाजिक सञ्जाल ट्विटरमा बुधबार साँझ लेखेका छन्, ‘१० बुँदे सहमति ‘एकतारे’ होइन, पार्टी एकता बचाएर देशहितका लागि बजाइएको ११ तारे बिगुल हो । यसको धून संस्थागत भइसकेको छ । सबैले ठण्डा दिमागले सुन्नु स्वास्थ्यका लागि लाभदायक छ ।’
स्थायी कमिटीमा प्रतिवादको तयारी
विधान महाधिवेशनको समीक्षा र राष्ट्रिय महाधिवेशनबारे छलफल गर्न आज एमाले स्थायी कमिटी बैठक बस्दैछ । बैठकको पूर्वसन्ध्यामा अध्यक्ष ओलीले १० बुँदेको ट्याङट्याङ नगर्न चेतावनी दिएपछि तेस्रो धारका नेताहरु बैठकमै ओलीसँग आक्रोश पोख्ने तयारीमा लागेका छन् ।
‘१० बुँदे सहमति कार्यान्वयनका सन्दर्भमा अध्यक्ष ओलीले जे विवाद ल्याउनुभयो, त्यो ठीक भएन । आज बस्ने बैठकमा यसबारे हामी कुरा उठाउँछौ, चुप लागेर बस्दैनौँ’, तेस्रो धारका एक स्थायी कमिटी सदस्यले रातोपाटीसँग भने, ‘हामीलाई त उहाँले दासजस्तै ठान्नुभयो ।’१० बुँदेको कार्यान्वयन सुदुरपश्चिम र वागमती लगायतका प्रदेशमा हुन सकेको छैन । अध्यक्ष ओली १० बुँदे कार्यान्वयन गर्न प्रतिवद्ध भएपछि माधव नेपालको साथ छोडेर १० जना स्थायी समिति सदस्यहरु एमालेमै बसेका थिए । तर, उनीहरुको माग र आवाज ओलीले दबाउँदै आएको गुनासो एमालेभित्र भुसको आगो जसरी फैलिएको छ ।
थप समाचार
एमालेमा १० बुँदेको कचकच : ढिलागरी बैठकमा गए भीम रावल
नेकपा एमालेमा फेरि १० बुँदे सहमतिको विषयमा लफडा सुरु भएको छ । एमाले स्थायी समिति बैठकको अघिल्लो दिन पार्टी अध्यक्ष केपी शर्मा ओलीले १० बुँदेको औचित्य नभएको अभिव्यक्ति दिएपछि असन्तुष्टि चुलिएको हो । ओलीको अभिव्यक्तिलाई लिएर तेस्रो धारका नेताहरु भीम, रावल, घनश्याम भुसालले सार्वजनिक रुपमै असन्तुष्टि जनाइसकेका छन् । ओलीले बुधबार बागमती प्रदेश अधिवेशन आयोजक कमिटीको बैठकमा पार्टीका कतिपय नेताहरुलाई ‘१० बुँदे, १० बुँदे भनेर ट्याङ ट्याङ नगर्न’ चेतावनी दिएका थिए ।
ओलीको सो अभिव्यक्तिपछि उपाध्यक्ष समेत रहेका रावलले पार्टीलाई एकताबद्ध बनाएर लैजाने हो भने सहमति कार्यान्वयनको हुनुपर्ने जवाफ ओलीलाई फर्काएका थिए । रावलले ट्वीटरमा ओलीलाई जवाफ फर्काएका छन्–‘१० बुँदे सहमति ‘एकतारे’ होइन, पार्टी एकता बचाएर देशहितका लागि बजाइएको ११ तारे बिगुल हो । यसको धून संस्थागत भइसकेको छ । सबैले ठण्डा दिमागले सुन्नु स्वास्थ्यका लागि लाभदायक छ ।’
यस्तै नेता घनश्याम भुसालले भने ओलीको अभिव्यक्तिको आलोचना गरेका छन् भने तेस्रो धारको प्रतिनिधित्व गर्ने नेताहरुले बिहीबारको स्थायी कमिटी बैठकमा ओलीको अभिव्यक्तिको विषयमा कुरा उठाउने बताएका छन् । ओलीले १० बुँदे सहमति कार्यान्वयन गर्ने प्रतिबद्धता जनाएकै कारण तेस्रो धारण नेताहरुले अन्तिम समयमा माधव नेपाललाई नयाँ पार्टी बनाउन सघाएका थिएनन् । यसैबीच ओलीको अभिव्यक्ति र तेस्रो धारणका नेताहरुको प्रतिजवाफपछि एमालेभित्र तरंग उत्पन्न भएको छ । यसै विषयमा साढे ३ बजे स्थायी समितिको बैठक सुरु हुनुअघि भीम रावलसहित नेताहरु सुरेन्द्र पाण्डे र ओली निकट शंकर पोखरेलबीच छलफल भएको छ । सोही छलफलका कारण तीन नेता ढिलागरी बैठक हलतर्फ प्रवेश गरेका थिए । छलफलमा के भयो भन्नेबारे खुलिसकेको छैन ।
अहिले एमाले स्थायी कमिटी बैठक तुल्सीलाल स्मृति प्रतिष्ठानमा जारी छ। बैठकमा विधान महाधिवेशनको समीक्षा, कार्तिक ६ गते हुने वडा अधिवेशन, कार्तिक ९ गते हुने पालिका अधिवेशन, राष्ट्रिय महाधिवेशन र हालै अविरल वर्षाका कारण भएको जनधनको क्षतिका सम्बन्धमा छलफल गर्नेगरी एजेण्डा तय गरिएको छ ।
