निर्वाचनआयोगमा दर्ताका लागि पुगेको एक पार्टीलाई आयोगले दर्ता गर्न नसक्ने भन्दै फर्काइदिएको छ ।आयोगमा दर्ता गर्न निवेदन, आवश्यक कागजपत्र बोकेर पुगेको ‘चिया पार्टी’ लाई आयोगले दर्ता नगरी फिर्ता पठाइदिएको हो । पार्टीको नाम हलुका किसिमको भएको र पार्टीको झण्डामा गाँजाको पात राखेपछि आयोगले दर्ता गर्न नमानेको सो दलका
महामन्त्री रविकिरण हमालले रातोपाटीलाई जानकारी दिए । उनले भने–‘केहीदिन अघि हामी पार्टी दर्ताका लागि आयोग गएका थियौँ । आयोगका पदाधिकारीसँग कुरा गर्दा पार्टीको नाम हलुका जस्तो भयो भन्नुभयो । झण्डामा गाँजाको सात वटा पात राखेका थियौँ । सो कारण देखाउँदै उहाँहरुले दर्ता गर्न नसक्ने पत्र काट्नुभयो ।’सडकदेखि दरबारसम्म सबैतिर चिया पाक्ने गरेको र चियाले तल्लो तप्काका मान्छेदेखि माथिल्लो तहका मान्छेहरूलाई समेट्ने भएकोले पार्टीको नाम चिया पार्टी राखिएको हमालले जानकारी दिए । चिया सामाजिकीकरण गर्ने, सबैको समान पहुँचको माध्यम भएकोले पनि चिया पार्टी गठन गरिएको उनले बताए ।
आयोगले भन्यो–‘हामीलाई जिस्क्याउन आउनुभयो कि क्या हो ?
चिया पार्टी दर्ताका लागि आएपछि आयोगका पदाधिकारी भने चकित भएका छन् । पार्टीको नाम देख्नेबित्तिकै आयोगका पदाधिकारीले हामीलाई जिस्काउन आउनुभएको त हैन भन्दै प्रश्न गरेका थिए । चिया पार्टीको झण्डा संविधानको भावना विपरित भएकोले पार्टी दर्ता नगरी फिर्ता पठाइदिएको आयोगका उप न्यायाधिवक्ता गुरुप्रसाद वाग्लेले रातोपाटीलाई जानकारी दिए ।
उप न्यायाधिवक्ता वाग्लेले भने–‘पार्टीको नाम हाम्रो चिया पार्टी भनेको रहेछ झण्डामा गाँजाको पात रहेछ त्यो त सिधै गैरकानुनी भयो । राजनीतिक दलप्रति वितृष्णा बढ्यो भन्दैमा जे मन लाग्छ त्यही पार्टी खोल्ने कुरा हुँदैन । कम्तिमा संविधानको प्रस्तावना, लोकतन्त्रका मुल्य मान्यताप्रति प्रतिबद्ध त हुनुपर्यो । चिया पार्टीले लोकतन्त्र, संविधानको मूल्य मान्यतालाई पनि संवोधन गरेको पाइएन । लागू औषध ऐन २०३३ ले गाँजालाई निषेध गरेको छ । कानुनले प्रतिबन्ध लगाएको लगाएको कुरा झण्डामा राख्दा आयोगले कसरी दर्ता गर्न सक्छ र ?’
सो पार्टीमा २१ सदस्य रहेको महामन्त्री हमालले जानकारी दिए । सबै नेताहरु ४० वर्षभन्दा कम उमेर समूहका यूवाहरु रहेको उनको भनाई छ । साथै पार्टीमा ५० प्रतिशत महिला सहभागिता रहेको, डाक्टर, इन्जिनियर, विभिन्न पेशामा आवद्ध व्यक्तिहरु पार्टीमा आवद्ध रहेको उनले बताए । आयोगले चियाको नाममा पार्टी दर्ता गर्न नमानेपछि पार्टीको नाम परिवर्तन गरेर एक दुई दिनभित्रै आयोगमा अर्को नाममा पार्टी दर्ताका लागि जाने हमालले बताए ।
